Cuort e bien

Tgei intent ha la spitex?
„Spitex“ vul gir tgira externa dil spital, cussegliaziun ed agid a casa.
Grazia allas prestaziuns dalla spitex san persunas malgrad limitaziuns corporalas restar a casa en lur contuorn. Pazients san per part turnar a casa pli baul suenter ina dimora el spital.

Finamira dalla spitex eis ei adina da mantener e promover l’autonomia persunala da sias clientas e ses clients. Leutier sesprovan las collaboraturas adina dad integrar el sustegn ed ella tgira ton sco pusseivel il contuorn privat dallas persunas pertuccadas.

Tgi sa far diever dalla spitex?
La spitex ei a disposiziun per tuts habitonts da tuttas vegliadetgnas ch’ein dependents d’agid pervia da malsogna, accident, invaliditad, vegliadetgna, maternitad ni ch’ein surdumandai.
Il basegns da sustegn vegn eruius ensemen cul client tras ina examinaziun individuala cunscienziusa e premurada.

Survetsch da pichet
Per nossa clientella ei endrizzau in survetsch da pichet da 24 uras. Il gi ora san ins contonscher direct sur il natel la tgirunza diplomada ch’ei en survetsch. La notg surprenda la centrala il survetsch da pichet. Tenor basegns vegn ina da nossas tgirunzas diplomadas clamada. 

Da cuminonza culs miedis da casa
Ils miedis da casa ni autras persunas specialisadas che tractan nos clients ein per nus partenaris impurtonts culs quals nus collaborein stretgamein.

Obligaziun da discreziun e schurmetg da datas
Ei secapescha da sesez che nossas collaboraturas e nos collaboraturs ein sutamess alla discreziun ed al schurmetg da datas.

Cumpetenza professiunala
Las collaboraturas dalla spitex possedan ina scolaziun speciala per la tgira da spitex quei sco tgirunza/tgirunz diplomada/-au, sco tgirunza/tgirunz da casa, spezialista/spezialist da tgira (FaGe) ni sco gidontra/gidonter da casa cun cuors da tgira dalla Crusch Cotschna Svizra.